Waldimar Pelser besoek Clanwilliam op 23 April

Waldimar Pelser, redakteur van Rapport, kom kuier saam met Clanwilliam Sakekamer op 23 April by Reinholds Restaurant in Clanwilliam.

Waldimar Pelser is sedert 2013 redakteur van die Afrikaanse Sondagkoerant Rapport. Pelser het in 1996 aan die Paul Roos Gimnasium op Stellenbosch gematrikuleer. In 1999 behaal hy die graad B.A. Regte aan die Universiteit Stellenbosch met regte, filosofie en politieke wetenskap as hoofvakke, en in 2001 B.Phil. Joernalistiek aan dieselfde instelling.

Daarna behaal hy in 2002 die graad M.Phil in Joernalistiek aan die Universiteit Stellenbosch en in 2004 ’n M.Phil. in ontwikkelingstudies aan die Universiteit van Oxford, waar hy met ’n Rhodes-beurs studeer het.

Sy eerste aanstelling was as verslaggewer by Die Burger in Kaapstad (Januarie 2001 tot Junie 2002), waartydens hy onder meer Suid-Kaapse korrespondent was in George. Van 2004 tot 2007 was hy ’n senior verslaggewer by die Johannesburgse dagblad Beeld. In 2007 gaan werk hy in Media24 se kantoor in Lagos, Nigerië, as Wes-Afrika-korrespondent en bly daar tot in 2008. Sy volgende aanstelling was as nuusredakteur by Beeld in Johannesburg, waar hy vertoef van 2009 tot 2011.

In die loop van 2011 word hy redakteur van die kortstondige nuustydskrif NuusNow/NewsNow. Kort voor dié tydskrif se sluiting word hy by Rapport aangestel as senior adjunkredakteur. Hy het Bokkie Gerber in 2013 as redakteur opgevolg. Hy is die aanbieder van die politieke program Verslag In Gesprek op kykNET.

Kaartjies verkoop teen R180 per persoon met ete ingesluit. RSVP voor Donderdag, 18 April 2019 by Ilse Lochner by strassberger@lando.co.za of skakel haar by 083 328 4575.

0 Comments

Leave a reply

Your email address will not be published. Required fields are marked *

*

six − three =

© 2019 MyCederberg. Alle Regte Voorbehou. Digitale projekbestuur deur Lightspeed Digital Media.

Log in with your credentials

Forgot your details?